Lars Martin Bjørnsrud Hopmoen er vår nye pensjonsekspert

Lars Martin Bjørnsrud Hopmoen har arbeidd i Statens pensjonskasse (SPK) i ti år. Han er pensjonsekspert og rådgivar ved kundesenteret, som behandlar nærmare 150 000 førespurnader kvart år.

Framover skal 32-åringen også dele kunnskap om pensjon i media og i sosiale medium, og gi råd og tips for ein god seniorøkonomi.

– Interessa for pensjon har auka dei siste åra, også blant dei unge. Samtidig synest mange at pensjon er komplisert, og det er vanskeleg å vite kva som gjeld for ein sjølv, seier Bjørnsrud Hopmoen.

Kunnskap gir fleire val og moglegheiter

Nærmare 1,2 millionar nordmenn har pensjon og forsikringar gjennom SPK.

Bjørnsrud Hopmoen er ekspert på nettopp offentleg tenestepensjon. Saman med kollega Svein Rasmussen skal han hjelpe fleire til å lære meir om eigen pensjon og kva som kan vere lurt å gjere — både tidleg i yrkeskarrieren, og når ein begynner å nærme seg pensjonsalder.

– Vi skal bidra til at fleire forstår kva moglegheiter dei har, for eksempel å kombinere arbeid med å ta ut pensjon. Alle skal vere trygge på at dei tar gode val for seg sjølv, tilpassa eigne behov og livssituasjon, kommenterer han.

Fire tips for større økonomisk føreseielegheit

Bjørnsrud Hopmoen anbefaler at du sjekkar desse punkta når det gjeld eigen pensjon:

1. Sjekk kva du har gjennom arbeidsgivaren din
   I tillegg til pensjon, har mange fleire fordelar gjennom arbeidsgivaren sin. Pensjonsordninga i SPK omfattar for eksempel også økonomisk støtte ved sjukdom eller dødsfall, samt boliglån med god rente.
2. Bli kjend med korleis pensjonsordninga di fungerer
   I somme ordningar kan du sjølv bestemme kor pengane skal plasserast og kor mykje risiko du er villig til å ta. SPK-pensjonen er trygg og føreseieleg. Han aukar for kvart år du arbeider, og vert årleg regulert i takt med lønnsveksten i samfunnet.
3. Få meir ved å kombinere jobb og pensjon
   Du får meir pensjon jo lenger du ventar med å ta han ut. Du sparer opp til pensjon så lenge du arbeider, også om du arbeider deltid. Hos SPK beheld du også dei andre fordelane i pensjonsordninga, så lenge du er i jobb.
4. Følg med på kva du får i pensjon
   Uansett om du nettopp har starta å jobbe, eller byrjar å nærme deg pensjonsalder, kan det vere lurt å sjekke kva du får i pensjon. Det finst fleire pensjonskalkulatorar du kan prøve. På spk.no kan du teste ulike scenario, for eksempel kva som skjer om du tar ut pensjon ved ulike aldrar, eller tar ut delar av pensjonen samtidig som du held fram med å jobbe.

Om Statens pensjonskasse

• Noregs største leverandør av offentleg tenestepensjon.
• Forvaltar pensjonsrettar og forsikringsordningar for nærmare 1,2 millionar nordmenn og deira familiar.
• Har meir enn 1 300 tilknytte verksemder og forvaltar 758,6 milliardar kroner i opptente pensjonsrettar.
• Ein vert automatisk medlem av ordninga ved å arbeide i ei verksemd som er tilknytt SPK. Statsansatte, lærarar, forsvar og politi er nokre av dei som har pensjon i SPK.
• Ordninga inkluderer også uførepensjon og ulike utbetalingar til etterlatne.