Du er her: Person > Pensjon > Uførepensjon > Vilkår

Vilkår

Uførepensjon frå Statens pensjonskasse kan innvilgast viss du må redusere stillingen din på grunn av sjukdom eller skade. Vi kan innvilge fast eller førebels pensjon.

Graden på uførepensjonen blir vedteke utfrå kor arbeidsufør du til einkvar tid er. I fall helsetilstanden blir betre, skal pensjonsutbetalingen endrast i samsvar med den nye uføregraden.

Du må som uførepensjonist sjølv syte for å gje oss melding om endringar i helsetilstand, stillingen sin storleik og arbeidsinntekt.

Du må også varsle oss om pensjonsutbetalingen ikkje blir endra i samsvar med dei nye opplysningane. Det er ikkje tilstrekkeleg å gje melding berre til trygdekontoret. Om det blir utbetalt for mykje pensjon fordi du ikkje har halde opplysningsplikta di, vil vi krevje at du betalar attende for mykje utbetalt pensjon.

Vi kan yta uførepensjon i ulike situasjonar:

• Redusert arbeidsinnsats ved sjukdom eller skade
• Overgong til lågare løna stilling på grunn av sjukdom 
• Pensjon på grunn av aldersslitasje
• Pensjon på grunn av yrkesskade

Redusert arbeidsinnsats ved sjukdom eller skade

Uførepensjon frå Statens pensjonskasse kan ytast til han/ho som blir arbeidsufør på grunn av sjukdom eller skade og som følgje av dette må arbeide mindre enn tidlegare. Vi kan innvilga heil eller delvis uførepensjon, det er difor ikkje noko krav at du er 100 prosent arbeidsufør.

Normalt kjem uførepensjon herfrå til utbetaling etter at du har vore sjukemeldt eit år. Det vil seia når sjukepengane frå folketrygda stansar. Sjukepengar erstattar løn. Vi  kan ikkje utbetale uførepensjon samstundes som du mottek sjukepengar.

Overgong til lågare løna stilling på grunn av sjukdom

Du kan ha rett til uførepensjon også om du på grunn av sjukdom eller skade får redusert  arbeidsinntekta di ved å gå over til ein lågare løna stilling. Uførepensjonen vil då langt på veg kompensera for inntektsbortfall. På den måten har du moglegheit til å fortsetje i full jobb, men ha eit arbeids- og ansvarsområde som er betre tilpassa din helsemessige situasjon.

Pensjon på grunn av aldersslitasje

Etter dagens regelverk vil medlemar som må slutta i stillingen sin på grunn av aldersslitasje, ha rett til uførepensjon frå Statens pensjonskasse. Med aldersslitasje meinast rett og slett at ein er fysisk eller psykisk utslitt på grunn av alderen. Dette må dokumenterast av lege. Ein må vera fylt 64 år og ha hatt samanhangande teneste i minst 5 år direkte før ein sluttar.

Aldersslitasje gjev ikkje rett til uførepensjon frå folketrygda. 

Pensjon på grunn av yrkesskade

I fall uførheiten skuldast ein yrkesskade gjeld særlege reglar. Desse reglane tek sikte på å kompensera for manglande moglegheiter for fortsatt opptening av pensjonsrettar. Ved yrkesskade blir den pensjonsgjevande oppteningstida alltid rekna etter full oppteningstid, dvs. 30 år.
Arbeidsgjevar har særlege plikter i fall ein er blitt ufør på grunn av ein yrkesskade. Det kan du lese meir om på sidene om yrkesskadeforsikring.

Begrensing i retten til uførepensjon
Arbeidsufør gjev ikkje alltid rett til uførepensjon frå Statens pensjonskasse.
Blir ein ufør innan to år etter innmelding og som skuldast sjukdom eller liding som arbeidstakaren hadde på innmeldingstidspunktet (men som enno ikkje hadde ført til arbeidsuførleik), gjev ikkje rett til uførepensjon viss arbeidstakaren må gå ut frå å ha kjent til sjukdomen/ lidinga på innmeldingstidspunktet.

Dette gjeld sjølv om arbeidstakaren ikkje kjente til kva sjukdom det seinare viste seg å vera, eller at det var sannsynleg at lidinga kunne utvikla seg til arbeidsuførleik. Viss særlege grunnar taler for det, kan styret i Statens pensjonskasse likevel innvilge pensjon i slike tilfeller.

Tilsvarande begrensingsregel gjeld også i fall du under dei siste to åra har gått opp i stillingsstorleik.

Ytingar frå NAV
Om du blir innvilga uførepensjon frå Statens pensjonskasse etter ein uføregrad på 50 % eller meir, pålegg vi deg å søkje om tilsvarande ytingar frå NAV.